Во рамките на регионалниот проект “Техничка поддршка за граѓанските организации“, кој се спроведува во земјите од т.н. Западен Балкан и Турција и е финансиран од Европската Унија, беше организиран циклус на обуки на тема “ Менаџмент на граѓанските организации“.
Лилјана Алчева од Прима Менаџмент Консалтинг, Македонија, заедно со Ирма Алпендитзе од МДФ, Холандија успешно го испорачаа овој циклус на обука.
Во периодот февруари – мај 2010 г., дваесетина претставници на граѓанските организации од Македонија, Хрватска, Србија, Босна и Херцеговина, Црна Гора, Албанија и Турција стекнаа знаења и вештини од областа на раководење со граѓански организации и се оспособија да испорачаат слична обука за потребите на TACSO проектот во нивните матични земји.
Циклусот на обука се одвиваше во три фази:
1. Основна обука за раководење, каде низ тридневна работилница учесниците се запознаа со концептите на организацискиот менаџмент и техниките за организациска анализа;
2. Индивидуална задача, при што секој од учесниците требаше да ги употреби техниките за организациска анализа на конкретен пример, најчесто својата организација, под менторство на обучувачите;
3. Обука за обучувачи, каде низ дводневна работилница учесниците се запознаа со техниките на испорачување обука.
Според оценките на учесниците, обуката ги постигна своите цели и тие стекнаа знаења, вештини и разбирање за да испорачуваат обука и работилници на теми од организацискиот менаџмент.